16
ақпан
2026
ТӘРБИЕ САҒАТЫ
Шымкент қаласы білім басқармасына қарасты Ө.Жолдасбеков атындағы №9 ІТ лицейінде 16.02.2026ж күні оқушылардың жас ерекшеліктеріне сай тәрбие сағаттары мен қауіпсіздік сабақтары «Адал азамат» біртұтас тәрбие жоспарына сай ұйымдастырылды. Мероприятие жас ұрпақтың рухани дамуы мен өмірлік қауіпсіздігін қамтамасыз етуге бағытталды.
1–4 сыныптарБастауыш сынып оқушылары үшін қазақ поэзиясының алыбы, ұлы жыршы, жыр дүлдүлі Жамбыл Жабаевтың туғанына 180 жыл толуына орай тағылымды тәрбие сағаты өткізілді. Оқушылар ақынның өмір жолымен танысып, отансүйгіштікке, елін сүюге, үлкенді құрметтеуге үндейтін жырларын мәнерлеп оқыды.
Жамбыл мұрасы арқылы ұлттық рух, сөз қадірі, поэзия құдіреті насихатталды.
Қауіпсіздік сабағының 10 минуттық бөлігінде «Су қоймаларындағы қауіптер» тақырыбы түсіндірілді. Балаларға өзен-көлдер мен су айдындарында сақтық шараларын сақтау, мұз үстіндегі қауіпсіздік, бейтаныс жерлерде шомылмау ережелері жан-жақты айтылды. Өмір қауіпсіздігі – басты құндылық екені ерекше атап өтілді.
5–8 сыныптарОрта буын оқушылары арасында «Лудомания» тақырыбында түсіндіру жұмыстары жүргізілді. Құмар ойындардың жасөспірім психологиясына, отбасы мен қоғамға тигізер кері әсері нақты мысалдар арқылы түсіндірілді. Саналы таңдау жасау, уақытты тиімді пайдалану, тәуелділіктің алдын алу жолдары талқыланды.
Қауіпсіздік сабағының 10 минутында:• «Қазақстандағы сенім телефондары мен жедел қызметтердің нөмірлері»
• «Жол белгілері және олардың мақсаты» (ЖЖЕ №6) тақырыптары қамтылды.
Оқушылар 101, 102, 103, 104, 112 бірыңғай байланыс нөмірлерінің маңызын біліп, төтенше жағдайда дұрыс әрекет ету алгоритмімен танысты. Сонымен қатар жол белгілерінің түрлері, олардың ескерту, тыйым салу және ақпараттық қызметтері түсіндіріліп, жолда жүру мәдениетін қалыптастыруға басымдық берілді.
9–11 сыныптарЖоғары сынып оқушылары үшін «Имандылық – адамгершілік пен ізгіліктің тірегі» тақырыбында мазмұнды пікір алмасу өтті. Сабақ барысында ұлттық құндылықтар, ар-ождан, жауапкершілік, үлкенге құрмет, кішіге ізет секілді қасиеттер кеңінен талқыланды. Имандылықтың жеке тұлғаның қалыптасуындағы, қоғам тұрақтылығындағы рөлі ерекше атап өтілді.
Қауіпсіздік сабағының 10 минутында жедел қызметтер мен сенім телефондарының нөмірлері қайталанып, құқықтық сауаттылық пен қауіпсіз мінез-құлық дағдылары бекітілді.
Өткізілген тәрбие және қауіпсіздік сабақтары оқушылардың рухани байлығын арттыруға, азаматтық жауапкершілігін қалыптастыруға және өмір қауіпсіздігін сақтауға бағытталды.Ұлттық құндылық пен заманауи қауіпсіздік мәдениетін ұштастыру – сапалы тәрбиенің негізі екені тағы бір мәрте дәлелденді.